Dr Toni vo Santa Cruz

Vor ca. 2 Wuche si dr Bäschtu (e Schwiizer Praktikant bi CodeGear) und ig gemütlich in e re Bar in Santa Cruz Downtown eis am trinke gsi, wo üs plötzlich e Hippi gfrogt het öb mir de vor Schwiiz sigi. Klar hei mir gseit, wieso är das usegfunde het? Naja het är (dr Toni) gmeint, är het 1969 mou es zytli ir Schwiiz gwohnt. Ds Konolfingen. Ok, är kennt d’Schwiiz, hei mir üs dänkt. Schleisslich isch das jo nid würklich es Turi-Dorf. Nach chlei nöcherem Froge, hei mir de usegfunde, dass är dazumou aus Stroosemusikant unterwägs isch gsi und so sis tägliche Brot verdient het. Chlei wiiter im Gspräch het är de no verzöut, dass är d’Patent Ochsner u dr Polo Hofer kennt. Klar, auso jetzt isch absolut ke Zwifu me gsi das är würklich dört isch gsi. Dr Toni het de verzöut, dass är mit jewile em Drummer vo Patent Ochsner (Andi Hug) und däm vom Polo Hofer es Album het ufgnoh (sowit mir verstande hei). Und jetzt chunts beschte… är het scho uf em Gurte gschpüut. Aber das isch vorem ne Zytli gsi, dazumau hets nume so um die 50 Lüt gha, auso es grössers Familiebrätle. Är het gemeint dases würklich e gueti Zyt isch gsi denn. Cha me guet vorstöue, schliesslich isch es jo zur Blüetezyt gsi vo de Hippis.

Die ganzi Sache het üs scho ziehmlich erstuhnt und het wieder mou zeigt wie chlii die Wäut isch. So am ne unschuldige Abe erwartet me nid grad so öppis. Anyway, faus mou öpper bi Patent Ochsner oder bim Polo verbiluegt, de bitte e Gruess vom Toni vo Santa Cruz usrichte!

Peace!

P.S. Solothurn isch nach ihm übrigens die beschti Stadt für Stroosemusikante. Ömu dazumal ;-).

Nachtrag: Bitte dr Comment vom Andi Hug läse, sehr wahrschiinlich hani scho es Bierli z’vüu gha ;).

Comment (1)

  1. andi hug wrote:

    chris,das ist voll schreg dass du toni getroffen hast. bloss die jahrezahlen sind falsch, das ganze hat sich zwischen 1983 und 85 zugetragen, mitnichten die hochblüte der hippies also. punk war angesagt.s.c.war schon damals retro und laidback(immer noch?)ich war geschockt als ich dort ankahm,erst nach einer weile hats gefägt.unsere band hiess streetprofits und hatte kultstatus in s.c.mehr nicht(und nicht weniger).gute zeit dir und lass toni allerherzl.grüssen wenn du ihn wieder sehen solltest.takecare.hugandi

    Wednesday, March 12, 2008 at 17:11 #